Rashmani Singh, Managing Director, Vahani Scholarship Trust chuan School Education Minister an hmuh duh chhan sawiin, zirlai harsa, lehkha thiam si te ṭanpui an duh tih a sawi a. Vahani Scholarship Trust chuan Mizoram zirlai naupangte pawh puih an inhuam reng thu sawiin, School Education Minister chu hmalakpui turin a sawm a ni.

Vahani Scholarship hi Pawl 12 zirlaiten an dil thei a. Pawl 10-a 85% hmu chin, kum khata chhungkaw sum lak luh cheng nuai thum (3) aia tlemten an dil thei a. Application leh interview hi online-a tih ṭhin a ni a. Kum tinin dil theih hun hi October ni 1 aṭanga November ni 1 chhunga hawn ṭhin a ni.

Vahani Scholarship Trust hian zirna sang zawka institution ṭha leh belh tlaka zirlaiten an zirna an chhunzawm theih nan kawng hrang hrangah an pui ṭhin a. He scholarship hian academic fee, tuition fee, hostel fee, textbook man, laptop stipend, internet stipend leh zin veivahna senso te huamin undergraduate course an zir chhung zawngin mentor an pe bawk a. Career counselling, internship leh skill development-ah te kaihhruaiin hna zawn thlengin zirlaite an pui ṭhin a ni.

Hei bakah hian Higher & Technical Education Minister, ICT Minister ni bawk Dr Vanlalthlana chuan vawiin khan Debjani Ghosh, NITI Aayog-a Distinguished Fellow leh Chief Architect, NASSCOM President ni ṭhin chu a kawm bawk a. Mizoram Engineering College (MEC) syllabus tur chungchang a sawipui.

Dr. Vanlalthlana chuan MEC zirlaiten industry-relevant skill an neih theih nana syllabus leh curriculum tun lai mil duan a nih theih nan NITI Aayog chu thawhpuiah a sawm a. Mizorama technology leh engineering zirna in sang awm mek MZU leh NIT bakah, Mizoram Engineering College chu hmang ṭangkaia Mizoram ṭhalaite tana IT hmanga ei zawnna tam zawk siamsak an nih theih dan a sawipui bawk.

Software Technology Park of India (STPI) chu mumal leh changtlung zawka kalpui a nih theih nan NITI Aayog chu thawhpuiah a sawm bawkin, Mizorama Technology Hub din a nih ngei theih nana state sawrkar hmalakna hrang hrang chu lo thlawp ṭhin turin a ngen bawk, niin vawiina sorkar thuchhuah chuan a tarlang.